నీళ్లు పోసి.. కంచె ఏర్పాటు..

ఫెన్సింగ్‌ ఏర్పాటు చేస్తున్న సిబ్బంది

చిట్యాల, న్యూస్‌టుడే: లక్ష్మీపూర్‌తండ పల్లె ప్రకృతి అధ్వానంగా మారింది. ఎవరూ పట్టించుకోకవపోవడంతో మొక్కలు ఎండిపోతున్నాయి. ఈ విషయమై ఈనెల 23న ‘ఈనాడు’లో ‘నమ్మడి.. ఇది పల్లె ప్రకృతి వనమే’ అనే శీర్షిక చిత్ర కథనం ప్రచురితమైంది. దీనికి అధికారులు స్పందించారు. ఎంపీడీవో రామయ్య గ్రామ పంచాయతీ సిబ్బందితో కలిసి వచ్చారు. ఎండిపోతున్న మొక్కలకు నీళ్లు పోయించారు. ఉద్యాన వనం చుట్టూ రక్షణ కంచె ఏర్పాటు చేయించారు. పిచ్చి మొక్కలను తొలగింపజేశారు. మొక్కల సంరక్షణకు తగిన జాగ్రత్తలు తీసుకోవాలని సర్పంచి జవహర్‌ను సూచించారు. ఆయన వెంట ఎంపీవో రామకృష్ణ, ఈజీఎస్‌ ఏపీవో అలీమ్‌, సిబ్బంది తదితరులు ఉన్నారు. ప్రకృతి వనంపై కలెక్టర్‌ భవేశ్‌మిశ్రా ఆరా తీశారు. సంబంధిత అధికారులపై ఆగ్రహం వ్యక్తం చేశారు. పల్లె ప్రకృతి వనాన్ని సందర్శించి మొక్కల సంరక్షణకు చర్యలు చేపట్టాలని ఆదేశించారు.