రామప్పను సందర్శించిన ఏపీ హైకోర్టు విశ్రాంత జడ్జి

వెంకటాపూర్‌, న్యూస్‌టుడే: వెంకటాపూర్‌ మండలంలోని రామప్ప ఆలయాన్ని సోమవారం ఆంధ్రప్రదేశ్‌ హైకోర్టు విశ్రాంత జడ్జి జి.యతిరాజులు కుటుంబ సమేతంగా సందర్శించారు. ఆలయ పూజారులు వారికి పూర్ణకుంభంతో స్వాగతం పలికారు. యతిరాజులు,  కుటుంబ సభ్యులు రామలింగేశ్వర స్వామికి ప్రత్యేక పూజలు చేశారు. పూజారులు ఆయనను శాలువాలతో సన్మానించి ఆశీర్వదించారు. పర్యాటక గైడ్‌లు ఆలయ చరిత్రను వారికి వివరించారు. అనంతరం ఆలయంపై శిల్పకళా సౌందర్యాన్ని వారు తిలకించారు. ఆలయ ప్రాంగణంలో ఫొటోలు దిగి వెళ్లిపోయారు. వారి వెంట ములుగు జడ్జి రామచందర్‌రావు, మొబైల్‌కోర్టు జడ్జి సౌఖ్య, ములుగు సీఐ శ్రీధర్‌, వెంకటాపూర్‌ ఎస్‌ఐ రాధిక తదితరులు ఉన్నారు.