పాడి రైతులకు భాగస్వామ్యం కల్పించండి

మంత్రి తలసానిని సన్మానించి వినతి పత్రం సమర్పిస్తున్న సంఘం నేతలు

వరంగల్‌ వ్యవసాయం, న్యూస్‌టుడే: విజయ డెయిరీ నిర్వహణలో పాడి రైతులకు భాగస్వామ్యం కల్పించాలని వరంగల్‌ విజయ డెయిరీ పాడి రైతుల సహకార సంఘం అధ్యక్షుడు ఇరుకు దేవేందర్‌రావు కోరారు. ఈ మేరకు మంగళవారం డెయిరీ పాడి రైతులతో కలిసి హైదరాబాద్‌లో రాష్ట్ర పశుసంవర్ధక, డెయిరీ శాఖ మంత్రి తలసాని శ్రీనివాస్‌ యాదవ్‌ను కలిసి వరంగల్‌ డెయిరీ పరిధిలో పాడి రైతుల సమస్యల్ని వివరించారు. ఉద్యోగుల నిర్లక్ష్యం కారణంగా పాడి రైతులకు ప్రోత్సాహం అందటం లేదన్నారు. పాలసేకరణ, విక్రయాల పెంపుదలకు చర్యలు తీసుకోవడం లేదన్నారు. పాడి రైతుల భాగస్వామ్యంతో నడుస్తున్న ములకనూరు డెయిరీ అధిక లాభాలు పొందుతుందన్నారు. విజయ డెయిరీ సమగ్ర అభివృద్ధికి పాడి రైతుల భాగస్వామ్యంతో విజయ కాకతీయ పాల సంఘాల సహకార యూనియన్‌ను ఏర్పాటు చేయుటకు అనుమతివ్వాలని మంత్రిని పాడి రైతులు కోరారు. లేకుంటే భవిష్యత్‌లో డెయిరీ మూసివేసే దశకు చేరుకుంటుందని తెలిపారు.