ముత్యంలా ధార.. జాలువారిన తార

వాజేడు, వెంకటాపురం, న్యూస్‌టుడే: దట్టమైన అడవిలో జలపాతాలు కనువిందు చేస్తున్నాయి. ఎత్తైన కొండలపై నుంచి పాలనురుగులా ఎగిసిపడుతున్న అందాలు సందర్శకులను అలరిస్తున్నాయి. ములుగు జిల్లా వాజేడు మండలం కొంగాల సమీపంలోని దుసపాటిలొద్ది జలపాతం పర్యాటకులకు కనువిందు చేస్తోంది. అదేవిధంగా వెంకటాపురం మండలం వీరభద్రవరం సమీప అభయారణ్యంలో ముత్యం జలధార జాలువారుతోంది. పచ్చని అడవిలో అందాలను సందర్శకులు తిలకిస్తున్నారు. కొద్ది రోజులుగా కురుస్తున్న వర్షాలకు ఎత్తైన కొండ నుంచి పాలనురగలా వరద ఉప్పొంగి కిందకు దుముకుతోంది. నిషిద్ధ అటవీ ప్రాంతం కావడం, మార్గం సైతం అనుకూలంగా లేకపోవడంతో స్వల్పంగానే పర్యాటకులు సందర్శిస్తున్నారు.

జాలువారుతున్న ముత్యం జలధార