ఎదురొచ్చిన కార్లు.. వెనక్కు తగ్గని వైరి వర్గాలు!

కొండా మురళి వాహనం ఎమ్మెల్యే నరేందర్‌ కారు

న్యూస్‌టుడే, ఖిలావరంగల్‌: ఖిలావరంగల్‌లో ఎమ్మెల్యే నన్నపునేని నరేందర్‌ మాజీ ఎమ్మెల్సీ కొండా మురళీధర్‌రావు కార్లు ఎదురుపడటం కొద్దిసేపు ఉత్కంఠకు దారితీసింది. మంగళవారం మొహర్రం సందర్భంగా మధ్యకోటలోని అషూర్‌ఖానాలో మురళీధర్‌రావు తమ నాయకులు, కార్యకర్తలతో పీరీలను దర్శించుకొని కారులో తిరిగి వస్తున్నారు. ఈ క్రమంలో ఎమ్మెల్యే నరేందర్‌ వాహనం ఎదురుగా వచ్చింది. రోడ్డు ఇరుకుగా ఉండటంతో రెండు వాహనాలు ఎదురెదురుగా నిలిచిపోయాయి. పోలీసులు మురళీధర్‌రావు వాహనం వెనెక్కి వెళ్లాలని చెప్పగా ఎదురుగా వచ్చిన వాహనమే తీయాలని తాము వెనక్కి తీయమని నిలిపారు. రెండు వర్గాల అనుచరులు తమ నాయకుడికి జై కొడుతూ నినాదాలు చేశారు. దీంతో ఉద్రిక్తత పరిస్థితి నెలకొంది. చేసేదేమీలేక పోలీసులు ఇరుపక్కల ట్రాఫిక్‌ను క్లియర్‌ చేసి రెండు కార్లను పంపించి ఊపిరి పీల్చుకున్నారు.