పండగకూ పస్తులుండాల్సిందేనా..?

నిరసన తెలుపుతున్న వీఆర్‌ఏలు

వెంకటాపురం, న్యూస్‌టుడే: రాష్ట్రంలో అతిపెద్ద పండగైన బతుకమ్మ, దసరాకు పస్తులతో బతకాల్సిందేనా అంటూ వీఆర్‌ఏల సంఘం మండల అధ్యక్షుడు కంటెం బలరాములు అన్నారు. పేస్కేలు జీవోను అమలు చేయాలని డిమాండ్‌ చేస్తూ స్థానిక తహసీల్దారు కార్యాలయం ఎదుట ఆ సంఘం చేపట్టిన రిలే నిరాహార దీక్షలు ఆదివారం 63వ రోజు కొనసాగాయి. ముఖ్యమంత్రి కేసీఆర్‌ ఇచ్చిన హామీలను అమలు చేస్తామంటూ చర్చలకు పిలిచిన మంత్రి కేటీఆర్‌ అదే తరహాలో బుజ్జగించి పంపడంపై అసహనం వ్యక్తం చేశారు. రాష్ట్ర వ్యాప్తంగా అన్ని కుటుంబాలు సంబరాలు చేసుకుంటుండగా మా గోడు కనిపించడం లేదా అంటూ మండిపడ్డారు. సంఘం నాయకులు రాజేశ్‌, సమ్మక్క, అరుణ, రజిత, బాజ్జీ తదితరులు పాల్గొన్నారు.