అత్యాచారం కేసులో ప్రజాప్రతినిధి పీఏ..

వరంగల్‌క్రైం, న్యూస్‌టుడే: వరంగల్‌ పోలీసు కమిషనరేట్‌ పరిధిలో జరిగిన అత్యాచారం కేసులో అధికార పార్టీ ఎమ్మెల్యే పీఏ నిందితుడిగా ఉన్నారు. హనుమకొండ పోలీసుల కథనం ప్రకారం.. ఇతర జిల్లాకు చెందిన ఓ విద్యార్థిని నగరంలోని ప్రైవేటు వసతి గృహంలో ఉంటూ న్యాయ విద్య చదువుతోంది. తల్లిదండ్రులకు తెలియకుండా ఆమె చరవాణిలో మాట్లాడుతుండగా.. వసతి గృహం నిర్వాహకురాలు గమనించింది. తాను చెప్పినట్లు చేయాలని.. లేకపోతే మీ అమ్మానాన్నకు చెబుతానని బెదిరించింది. భయపడిన యువతి అందుకు అంగీకరించింది. ఓ రోజు అలంకార్‌ జంక్షన్‌ సమీపంలోని గదికి విద్యార్థినిని తీసుకెళ్లింది. అక్కడున్న వ్యక్తి ఆమెపై అత్యాచారానికి పాల్పడ్డాడు.  ఎవరికైనా చెబితే చంపుతామని బెదిరించారు. ఆ తర్వాత నక్కలగుట్టలోని ఓ హోటల్‌ గదికి తీసుకెళ్లారు. అక్కడ ఓ ప్రజాప్రతినిధి పీఏ సైతం ఆమెపై అత్యాచారం చేశాడు. ఆమె ఫొటోలను తీసుకొని వసతి గృహం నిర్వాహకురాలు, ఇతరులకు పంపించారు. ఈ వేధింపులు భరించలేని బాధితురాలు.. తనను మానసికంగా వేధించారని, ఇద్దరు వ్యక్తులు అత్యాచారం చేశారని, వారికి వసతి గృహం నిర్వాహకులు సహకరించారని హనుమకొండ పోలీసులకు ఫిర్యాదు చేసింది. కేసు నమోదు చేసిన పోలీసులు నిందితులను అరెస్టు చేసి కోర్టులో హాజరుపర్చారు. నిందితులను రిమాండ్‌కు తరలించారు.