సౌత్‌జోన్‌ ఈత పోటీలు ప్రారంభం

క్రీడా జ్యోతితో ఎమ్మెల్యే రమేష్‌, నిర్వాహకులు

రంగశాయిపేట, న్యూస్‌టుడే: రంగశాయిపేట శివారులోని బిర్లా ఓపెన్‌ మైండ్స్‌ హై స్కూల్లో సీబీఎస్‌ఈ సౌత్‌జోన్‌ స్థాయి ఈత పోటీలను శనివారం వర్ధన్నపేట ఎమ్మెల్యే అరూరి రమేష్‌ ప్రారంభించారు. ఈ సందర్భంగా ఆయన మాట్లాడుతూ.. క్రీడాకారులు గెలుపు ఓటములు సహజంగా తీసుకొని ముందుకెళ్లాలన్నారు. అనంతరం క్రీడా పతాకాన్ని ఆవిష్కరించి, క్రీడా జ్యోతిని వెలిగించారు. ప్రారంభ వేడుకల్లో భాగంగా విద్యార్థులు ప్రదర్శించిన వివిధ సాంస్కృతిక కార్యక్రమాలు అందరిని అలరించాయి.  ఈ పోటీల్లో తెలంగాణ, ఆంధ్రప్రదేశ్‌, తమిళనాడు, పుదుచ్చేరి, కర్ణాటక, అండమాన్‌ నికోబార్‌ దీవుల ప్రాంతాల నుంచి 1200 క్రీడాకారులు, శిక్షకులు భాగస్వాములయ్యారు. ఇందులో రాష్ట్రంలోని వరంగల్‌, మొదక్‌, హైదరాబాద్‌ ప్రాంతాల విద్యార్థులు పోటీల్లో పాల్గొన్నారు. డైరెక్టర్‌ వెంకటేశ్వర్‌రావు, సౌత్‌జోన్‌ మాస్టర్‌ ఫ్రాంచైజీ సాయి సందీప్‌, భారత స్విమ్మింగ్‌ ఫెడరేషన్‌ కోశాధికారి రామకృష్ణ, వర్ధన్నపేట ఎంపీపీ అప్పారావు, 43, 44 డివిజన్ల కార్పొరేటర్లు జలగం అనిత, ఈదురు అరుణ, ప్రిన్సిపాళ్లు రాజ్‌కుమార్‌ జోషి, మెర్గిన్‌ మన్నస్‌ పాల్గొన్నారు.