భద్రకాళి బండ్‌పై సగర్వంగా ఘనకీర్తి

కార్పొరేషన్‌, న్యూస్‌టుడే: భద్రకాళి బండ్‌పైన మువ్వన్నెల జాతీయ జెండా రెపరెపలాడుతోంది. హైదరాబాద్‌ ట్యాంకు బండ్‌ సంజీవయ్య పార్కు వద్ద ఏర్పాటు చేసిన విధంగా వరంగల్‌ భద్రకాళి బండ్‌ పైన 150 అడుగుల భారీ జాతీయ జెండా ఏర్పాటుతో 365 రోజులు నగర వాసులకు స్ఫూర్తి కలిగిస్తుంది. గ్రేటర్‌ వరంగల్‌ సాధారణ నిధుల ద్వారా సుమారు రూ.25 లక్షలతో ఏర్పాటుకు ప్రతిపాధించారు. వరంగల్‌ పోతనరోడ్డు వైపు ప్రధాన ద్వారం ముస్తాబవుతోంది. వరంగల్‌ ఉమ్మడి జిల్లా పర్యాటక శాఖ ఆధ్వర్యంలో అతి త్వరలోనే బోటింగ్‌ అందుబాటులోకి రానుంది. సందర్శకులు బోటు షికారు ద్వారా భద్రకాళి చెరువు అందాలు, శ్రీ భద్రకాళి దేవాలయం, 150 అడుగుల జాతీయ జెండా కూడలి చూసేందుకు అవకాశం దక్కుతుంది. గణతంత్ర దినోత్సవం సందర్భంగా కొత్తగా ఏర్పాటు చేస్తున్న జాతీయ జెండాను నేడు(గురువారం) ప్రారంభిస్తారు.