అధిష్ఠానం ఆదేశిస్తే పాలకుర్తి నుంచి పోటీ చేస్తా

మాజీ ఎమ్మెల్సీ కొండా మురళీధర్‌రావు

మాట్లాడుతున్న కొండా మురళీధర్‌రావు

తొర్రూరు, న్యూస్‌టుడే: కాంగ్రెస్‌ కార్యకర్తలను కంటికి రెప్పలా కాపాడుకుంటానని, పార్టీ అధిష్ఠానం ఆదేశిస్తే పాలకుర్తి నియోజకవర్గం నుంచి పోటీ చేసేందుకు సిద్ధమని మాజీ ఎమ్మెల్సీ, కాంగ్రెస్‌ సీనియర్‌ నాయకుడు కొండా మురళీధర్‌రావు తెలిపారు. తొర్రూరులో పార్టీ పట్టణాధ్యక్షుడు సోమరాజశేఖర్‌ నివాసంలో శుక్రవారం రాత్రి ఏర్పాటు చేసిన విలేకరుల సమావేశంలో ఆయన మాట్లాడారు. ఈనెల 9 నుంచి వరంగల్‌ తూర్పు నియోజకవర్గంలో మాజీ మంత్రి కొండా సురేఖ పాదయాత్ర ప్రారంభమవుతుందన్నారు. నియోజకవర్గంలో పార్టీ ఓటుబ్యాంకుకు కొదవలేదన్నారు. పీసీసీ అధ్యక్షుడు రేవంత్‌రెడ్డితో చర్చించి నిర్ణయాన్ని ప్రకటిస్తానన్నారు. స్థానిక మంత్రి ఎర్రబెల్లి దయాకర్‌రావుతో కుదరకనే తాను భారాస నుంచి బయటకు వచ్చానన్నారు. సమావేశంలో పార్టీ మండలాధ్యక్షుడు చెవిటి సధాకర్‌, వార్డు కౌన్సిలర్‌ భూసాని రాము, నాయకులు శ్రీనివాస్‌గౌడ్‌, రాజుగౌడ్‌, నాయకులు పాల్గొన్నారు.