కబ్జాదారులకు గుణపాఠం తప్పదు: కొండా మురళి

తూర్పు నుంచే సురేఖ పోటీ

కాంగ్రెస్‌ నాయకులతో  సమావేశమైన కొండా మురళి

రంగంపేట, న్యూస్‌టుడే: ‘గ్రేటర్‌ వరంగల్‌ పరిధిలో అడుగడుగునా ఆక్రమణలు, కబ్జాలే, ఇంతెందుకు హనుమకొండ గోపాలపూర్‌లో నా ఫాంహౌజ్‌ స్థలాన్ని కబ్జా చేశారు. దీనివెనుక ఎమ్మెల్యే పాత్ర ఉంది’ అని మాజీ ఎమ్మెల్సీ కొండా మురళీ ఆరోపించారు. వచ్చే ఎన్నికల్లో కబ్జాదారులకు గుణపాఠం తప్పదన్నారు. వరంగల్‌ తూర్పు నుంచి మాజీ మంత్రి కొండా సురేఖ పోటీ చేస్తారని స్పష్టం చేశారు. శుక్రవారం హనుమకొండ రాంనగర్‌లోని తన నివాస గృహంలో తూర్పు ముఖ్య కాంగ్రెస్‌ నాయకులు, కార్యకర్తలతో సమావేశం జరిగింది. ఈనెల 9 నుంచి మాజీ మంత్రి సురేఖ పాదయాత్ర మొదలవుతుందని, డివిజన్ల వారీగా రూటు మ్యాపు ఖరారు చేయాలని కాంగ్రెస్‌ నాయకులను కోరారు. డివిజన్లలో నెలకొన్న సమస్యలను సమావేశంలో చర్చించారు. అనంతరం జరిగిన విలేకరుల సమావేశంలో కొండా మురళీ మాట్లాడుతూ తాము కాంగ్రెస్‌లోనే కొనసాగుతామని, వచ్చే ఎన్నికల్లో తూర్పు నుంచి బరిలోకి దిగుతామని స్పష్టం చేశారు. ఈనెల 6 నుంచి ప్రారంభమయ్యే టీపీసీసీ అధ్యక్షుడు రేవంత్‌రెడ్డి హత్‌ సే హత్‌ జోడో యాత్రలో తూర్పు ముఖ్య నాయకులందరూ పాల్గొనాలన్నారు. కార్యకర్తలు ఎవరికీ భయపడొద్దని, మీకు ఏ కష్టమొచ్చిన అండగా ఉంటానని తెలిపారు. సమావేశంలో ముఖ్య నాయకులు రమేష్‌, ప్రభాకర్‌, శ్రీనివాస్‌ పాల్గొన్నారు.