సంక్షేమ పథకాల ఘనత సీఎం కేసీఆర్‌దే

మాట్లాడుతున్న జడ్పీ అధ్యక్షురాలు ఆంగోతు బిందు

గార్ల, న్యూస్‌టుడే: అభివృద్ధి, సంక్షేమ పథకాల ఘనత ముఖ్యమంత్రి కేసీఆర్‌దేనని జడ్పీ అధ్యక్షురాలు ఆంగోతు బిందు అన్నారు. స్థానిక వర్తక సంఘం భవనంలో సోమవారం ఆత్మీయ సమ్మేళనం సమావేశంలో ఆమె మాట్లాడారు. 75 సంవత్సరాల్లో కాంగ్రెస్‌ చేయలేని అభివృద్ధి, సంక్షేమ పథకాలను 8 ఏళ్లలో తెరాస నుంచి భారాస దాకా నిర్వహించిన ఘనత ముఖ్యమంత్రికే దక్కుతుందన్నారు. ప్రధాని మోదీ పాలనలో గ్యాస్‌ సిలిండర్‌ ధరలు పెరిగి పేద, మధ్య తరగతి ప్రజలకు భారాలుగా మారాయని ఆరోపించారు. ప్రభుత్వం చేపడుతున్న అభివృద్ధి పనులు, సంక్షేమ పథకాలను గడప గడపకు వెళ్లి ప్రజలకు వివరించాలని ఆమె కోరారు. మంత్రి కేటీఆర్‌ ఆదేశాలు, ఎమ్మెల్యే హరిప్రియ సూచనల మేరకు ఆత్మీయ సమ్మేళనాన్ని గార్ల మండలంలో ఏప్రిల్‌ మొదటి వారంలో నిర్వహించనున్నట్లు వెల్లడించారు. ఆత్మీయ సమ్మేళనంను జయప్రదం చేయాలని ఆమె కోరారు. ఎంపీపీ శివాజీచౌహాన్‌, సర్పంచి బన్సీలాల్‌, ఎంపీటీసీ సభ్యుడు రమేష్‌, సర్పంచుల సంఘం అధ్యక్షుడు మోతీలాల్‌, భారాస మండలాధ్యక్షుడు లక్ష్మణ్‌నాయక్‌, రాధాకృష్ణ, భాస్కరరావు, గణేష్‌ తదితరులున్నారు.