ప్రభుత్వ స్థలంపై కన్ను

హంటర్‌రోడ్‌ ఎన్టీఆర్‌ నగర్‌లో ప్రభుత్వ స్థలం

రామన్నపేట, న్యూస్‌టుడే: వరంగల్‌ ప్రాంతం హంటర్‌రోడ్‌ ఎన్టీఆర్‌ నగర్‌లోని ప్రభుత్వ స్థలంపై ప్రైవేటు వ్యక్తులు కన్నేశారు.  1997-98లో భద్రకాళి చెరువు దిగువున ప్రభుత్వ స్థలాన్ని వీకర్‌ సెక్షన్‌ లేఅవుటు కాలనీ చేశారు. 60- 70 మంది దారిద్య్రరేఖకు దిగువున ఉన్నవారికి పట్టాలు పంపిణీ చేశారు. ఇక్కడ ఉన్న పార్కు, లేఅవుటు ఖాళీ స్థలాలపై  ప్రైవేటు వ్యక్తులు కన్నేశారు. నాలుగైదేళ్లుగా ఇద్దరు, ముగ్గురు వ్యక్తులు స్థలాన్ని సొంతం చేసుకునే యత్నాలను స్థానికులు అడ్డుకున్నారు. ఆదివారం ఉదయం ముగ్గురు ప్రైవేటు వ్యక్తులొచ్చి డోజర్‌తో స్థలాన్ని చదును చేస్తుండగా స్థానిక ప్రజలు అభ్యంతరం వ్యక్తం చేయడంతో వెళ్లిపోయారు. సుమారు 260 గజాల స్థలంపై పలువురు కన్నేశారని, రెవెన్యూ శాఖ, గ్రేటర్‌ వరంగల్‌ అధికారులు స్పందించి స్థలాలకు హద్దులు ఖరారు చేసి, బోర్డు ఏర్పాటు చేయాలని స్థానికులు డిమాండ్‌ చేస్తున్నారు.