తేనెటీగల దాడిలో రైతు మృతి

కొత్తగూడ: మహబూబాబాద్‌ జిల్లా కొత్తగూడ మండలం నీలంపల్లి గ్రామ సమీపంలో శుక్రవారం జరిగిన తేనెటీగల దాడిలో రైతు పొన్‌రెడ్డి సంజీవ(50) మృతి చెందారు. గ్రామస్థులు తెలిపిన వివరాల ప్రకారం.. సంజీవ ఆయన సోదరుడు జనార్ధన్‌రెడ్డి వ్యవసాయ పొలంలో పనులు చేస్తుండగా.. ఒక్కసారిగా తేనెటీగలు దాడి చేయడంతో పరుగు పెట్టారు. సమీపంలోని వ్యవసాయ బావిలో దూకి తప్పించుకునేందుకు ప్రయత్నించగా సంజీవకు ఈత రాకపోవడంతో బావిలో మునిగిపోయి మృతి చెందాడు. జనార్ధన్‌రెడ్డికి ఈత రావడంతో ప్రాణాలతో బయటపడ్డాడు. సంఘటనా స్థలానికి చేరుకున్న ఎస్సై నగేశ్‌ కేసు నమోదు చేసుకొని దర్యాప్తు చేస్తున్నారు.