అడవిపై గొడ్డలి వేటు

కేశవాపూర్‌ సమీపంలో నేలకొరిగిన వృక్షాలు

ఈనాడు డిజిటల్‌, జయశంకర్‌ భూపాలపల్లి, మహాముత్తారం, న్యూస్‌టుడే : తెలంగాణకు హరితహారం కార్యక్రమంతో రాష్ట్రంలో మొక్కలు నాటే కార్యక్రమాన్ని ప్రభుత్వం ఉద్యమంగా నిర్వహిస్తోంది. ఇటీవల పోడుదారులకు హక్కులు కల్పిస్తూ పట్టాలు ఇచ్చారు. ఇక పోడు జరగొద్దని, అడవులను కాపాడుకోవాలని రాష్ట్ర ముఖ్యమంత్రి పిలుపునిచ్చారు. కానీ, ప్రభుత్వ ఉద్దేశాన్ని లెక్కచేయకుండా కొందరు అడవులను యథేచ్ఛగా నరుకుతూ పోడు భూములుగా మార్చుతున్నారు. తాజాగా మహాముత్తారం మండలం కేశవాపూర్‌ సమీపంలోని పెద్దవాగు లోలెవల్‌ వంతెనకు అతిదగ్గరలో కాటారం-మేడారం ప్రధాన రహదారి పక్కనే అడవిలో పెద్దఎత్తున చెట్లు నరికారు. దాదాపు 3 ఎకరాల్లో అడవిని నాశనం చేశారు. ఈ ఘటన ఆలస్యంగా వెలుగుచూసింది. ఎక్కడో అడవి మధ్యలో చేసింది కాదు. ప్రధాన రహదారి వెంట ఇంత పెద్దఎత్తున అడవిని నరకడం చర్చనీయాంశంగా మారింది. చెట్లను నరికిన ప్రదేశంలోనే అడవుల సంరక్షణ బోర్డు ఉండటం విశేషం.

తెరవెనుక కొందరు : ఇక్కడి అడవులను నరికింది గొత్తికోయలుగా అధికారులు గుర్తించారు. కానీ, సమీప గ్రామానికి చెందిన కొందరు వ్యక్తులు తెరవెనుక చక్రం తిప్పుతూ గొత్తికోయలను ముందుంచి పోడుకు పాల్పడినట్లు తెలిసింది. రహదారి వెంట భూములకు డిమాండ్‌ వస్తుందనే వక్రబుద్ధితో అక్రమార్కులు అమాయకులతో పోడు చేయించినట్లు సమాచారం. ఈ విషయమై మహదేవపూర్‌ ఎఫ్‌డీవో వజ్రారెడ్డిని సంప్రదించగా అడవిని నరికిన 8 మందిపై కేసు నమోదు చేసి రిమాండ్‌కు పంపినట్లు చెప్పారు. దీని వెనుక బయటి వ్యక్తులున్నట్లు అనుమానాలు వ్యక్తమవుతున్నాయని, దానిపైనా విచారణ చేస్తున్నామని చెప్పారు.