సింగరేణి ఉద్యోగులకు బకాయిల చెల్లింపు

చెక్కు అందజేస్తున్న జీఎం శ్రీనివాసరావు

కోల్‌బెల్ట్‌, న్యూస్‌టుడే : సింగరేణి ఉద్యోగులకు 11వ వేతన ఒప్పందం బకాయిలు(ఏరియర్స్‌) గురువారం చెల్లించినట్లు యాజమాన్యం ఒక ప్రకటనలో తెలిపింది. హైదరాబాద్‌ సింగరేణి భవన్‌ నుంచి డైరెక్టర్‌(ఫైనాన్స్‌) బలరాం నిధులు విడుదల చేసినట్లు తెలిపారు. కొంత మంది కార్మికులకు చెక్కులు పంపిణీ చేసినట్లు పేర్కొన్నారు. 23 నెలల వేతనంలోని బకాయిలను ఒకే సారి ఇచ్చామని, సగటున ఒక్కో కార్మికుడికి రూ.3.70 లక్షల వరకు వచ్చాయని, అత్యధికంగా రామగుండం ఏరియా హెడ్‌ ఓవర్‌మెన్‌ రూ.9.91 లక్షలు పొందారని వెల్లడించారు. కంపెనీ వ్యాప్తంగా మొత్తం రూ.1450 కోట్లు చెల్లించినట్లు పేర్కొన్నారు. 39 వేల మంది కార్మికుల ఖాతాల్లో జమ చేసినట్లు పేర్కొన్నారు. ఏరియర్స్‌ పొందిన ఉద్యోగులు సొమ్మును పొదుపుగా వాడుకోవాలని సూచించారు. భూపాలపల్లి ఏరియాలోని జీఎం కార్యాలయంలో జీఎం శ్రీనివాసరావు ఏరియర్స్‌ చెల్లింపు చెక్కులను గురువారం పంపిణీ చేశారు. కేటీకే 5వ గనికి చెందిన కార్మికులు ప్రభాకర్‌, గణపతిరెడ్డి, రవీందర్‌కు అందజేశారు. కార్యక్రమంలో ఎస్వోటూజీఎం వెంకటయ్య, అధికారులు తుకారాం, క్రాంతికుమార్‌ పాల్గొన్నారు.