కోడి పందేలను అడ్డుకున్న జనసేన నాయకులు

మండపాక కోడి పందేల వద్ద పడవేసిన టెంట్లు

తణుకు, న్యూస్‌టుడే: సంక్రాంతి సందర్భంగా తణుకు మండలం మండపాకలో నిర్వహిస్తున్న కోడి పందేలను జనసేన పార్టీ నాయకులు శుక్రవారం అడ్డుకున్నారు. సంక్రాంతికి గ్రామంలో ఎటువంటి పందేలు, జూదాలు, పేకాట, గుండాట వంటి వాటిని నిర్వహించకూడదని రెండు రోజుల ముందు నుంచే పంచాయతీ ప్రజాప్రతినిధులు, అధికారులు టాంటాం వేయించారు. అయినా అధికార పార్టీ నాయకులు గ్రామంలో కోడి పందేలు నిర్వహించడంతో జనసేన నియోజకవర్గ ఇన్‌ఛార్జి విడివాడ రామచంద్రరావు ఆధ్వర్యంలో గ్రామ సర్పంచి జానా వెంకటలక్ష్మి, ఉపాధ్యక్షుడు వట్టికూటి శివనాగప్రసాద్‌, వార్డు సభ్యులు అడ్డుకున్నారు. కోడి పందేలు, పేకాట, గుండాటలు మా కొద్దు అంటూ నినాదాలు చేశారు. పందేలు నిర్వహిస్తే తాము పెట్రోలు పోసుకుని నిప్పంటించుకుంటామని తెలిపారు. ఈ క్రమంలో అధికార, జనసేన పార్టీలకు చెందిన వర్గాల మధ్య వివాదం తలెత్తింది. తణుకు సీఐ సీహెచ్‌ ఆంజనేయులు, ఎస్సై ఎం.రాజకుమార్‌ ఆధ్వర్యంలో పోలీసులు రంగ ప్రవేశం చేసి పందేలను నిలుపుదల చేశారు.