చెరువుల అభివృద్ధితో భూగర్భ జలాల పెరుగుదల

రాజానగరంలో అవగాహన ప్రదర్శన చేస్తున్న అధికారులు, సంస్థ ప్రతినిధులు

బుట్టాయగూడెం, న్యూస్‌టుడే: చెరువులను అభివృద్ధి చేయడం ద్వారా భూగర్భ జలాల పెరుగుదల సాధ్యమవుతుందని ఏపీ సమీకృత సాగునీరు, వ్యవసాయ పరివర్తన పథకం సహాయ పథక సంచాలకుడు జి.ప్రవీణ్‌కుమార్‌ తెలిపారు. రాజానగరం, మెరకగూడెంలలో సేవా స్వచ్ఛంద సంస్థ ఆధ్వర్యంలో బుధవారం చెరువుల అభివృద్ధి, సద్వినియోగంపై శిక్షణ కార్యక్రమాన్ని నిర్వహించారు. ఈ సందర్భంగా ప్రవీణ్‌కుమార్‌ మాట్లాడుతూ ఎంపిక చేసిన 9 మండలాల పరిధిలోని 33 గ్రామాల్లో చెరువులను అభివృద్ధి చేసి పది వేల ఎకరాల భూమికి సాగునీటిని అందిస్తున్నట్లు వివరించారు. అనంతరం ఆయా గ్రామాల్లో అవగాహన ప్రదర్శన చేశారు. మహిళలకు ముగ్గుల పోటీ నిర్వహించారు. పథకం జిల్లా రిసోర్స్‌ పర్సన్‌ టీఎన్‌ స్నేహన్‌, స్వచ్ఛంద సంస్థ సమన్వయకర్త యు.రాజ్‌కుమార్‌, సర్పంచులు కుంజా దుర్గమ్మ, సోదెం గంగాదేవి, పలువురు రైతులు పాల్గొన్నారు.