సైబర్‌ నేరాలపై అప్రమత్తత అవసరం : డీఐజీ

భీమడోలు పోలీసు స్టేషన్‌ పరిసరాలను పరిశీలిస్తున్న మోహనరావు

భీమడోలు, న్యూస్‌టుడే: నూతన సాంకేతిక పరిజ్ఞానం అందుబాటులోకి రావటంతో కొంత కాలంగా సైబర్‌ నేరాలు పెరుగుతున్నాయని వీటిబారిన పడకుండా ప్రతిఒక్కరూ అవగాహనతో ఉండాలని ఏలూరు డీఐజీ కె.వి.మోహనరావు అన్నారు. భీమడోలు పోలీసు స్టేషన్‌ను ఆయన శనివారం పరిశీలించారు. కార్యాలయంలోని దస్త్రాలు, అధికారులు ఉపయోగించే వాహనాలు, సిబ్బంది క్వార్టర్లను పరిశీలించారు. సచివాలయ మహిళా పోలీసులతో వారి పనితీరును ఆరా తీశారు. ఈ సందర్భంగా ఆయన మాట్లాడుతూ ఆన్‌లైన్‌ మోసాలు పెరుగుతున్నాయన్నారు. బ్యాంకు ఖాతా వివరాలు, ఓటీపీ, బహుమతులు వచ్చాయంటూ అపరిచితులు పంపే వెబ్‌ లింకుల విషయంలో స్పందించవద్దని ఆయన పేర్కొన్నారు. కార్యక్రమంలో ఎస్సై వి.ఎస్‌.వి.భద్రరావు పాల్గొన్నారు.