వేగంగా కారు నడిపి.. ఒకరిని ఢీకొట్టి..

పరీక్షల ఆఖరిరోజు విద్యార్థుల హల్‌చల్‌

 జంగారెడ్డిగూడెం, న్యూస్‌టుడే: జంగారెడ్డిగూడెం పట్టణంలోని రామచంద్ర కళాశాల కూడలిలో గురువారం ద్విచక్ర వాహనంపై ప్రయాణిస్తున్న ఓ విద్యార్థిని కారు ఢీకొట్టింది. తేజ అనే విద్యార్థి గాయపడ్డారు. ఇంటర్మీడియట్‌ ప్రధాన పరీక్షలు పూర్తికావడంతో ఓ ప్రైవేటు కళాశాల విద్యార్థులు గురువారం మధ్యాహ్నం కారులో షికారు చేశారు. కారును వేగంగా నడుపుతూ ద్విచక్ర వాహనాన్ని ఢీకొట్టారు. ప్రమాదానికి కారణమైన విద్యార్థులు కొందరు మత్తులో ఉన్నట్లు చెబుతున్నారు. కారును సమీపంలోని తుప్పల్లోకి నెట్టుకెళ్లి ఎవరికీ కనిపించకుండా దాచేందుకు ప్రయత్నించినట్లు సమాచారం. తీవ్రంగా గాయపడిన ద్విచక్ర వాహన దారుడిని ప్రైవేటు ఆసుపత్రికి తరలించారు. ఎటువంటి ఫిర్యాదు అందలేదని ఎస్‌ఐ సాగర్‌బాబు తెలిపారు.