మృతదేహంతో ధర్నా

ఒత్తిడే కారణమంటూ బంధువుల ఆరోపణ

ఏలూరు నేరవార్తలు, న్యూస్‌టుడే : తన భర్త మృతికి ఓ న్యాయవాది, వేరే జిల్లాలో పని చేస్తున్న ఏఎస్పీ కారణమంటూ బాధితురాలు, బంధువులు మృతదేహంతో న్యాయవాది ఇంటి ఎదుట ఆందోళనకు దిగిన ఘటన సోమవారం నగరంలో చోటు చేసుకుంది. మృతుడు భార్య ప్రేమలత, బంధువులు తెలిపిన వివరాలు.. ఏలూరు శనివారపుపేట ఇంద్రా కాలనీకి చెందిన కూకటి సోమరాజు (45), ప్రేమలత కుమారుడైన శ్యామ్‌, అదే ప్రాంతానికి చెందిన పెనుబోతుల సాయి మరికొంత మంది కలిసి ఇటీవల క్రికెట్‌ ఆడుతుండగా గొడవ జరిగి కొట్టుకున్నారు. ఈ నేపథ్యంలో 9న ఏలూరు త్రీటౌన్‌ పోలీసులు సోమరాజు తదితరులను స్టేషన్‌కు పిలిపించి కేసులు నమోదు చేస్తామని బెదిరించారు. పట్టణంలోని న్యాయవాదితోపాటు మరో జిల్లాలో ఉన్న ఓ ఏఎస్పీ కూడా తమకు తెలుసు అని అంతా వారిద్దరే చూసుకుంటారని సాయి అమ్మ బెదిరించారు. ఈ క్రమంలోనే సోమరాజును రోజూ పోలీసు స్టేషన్‌కు పిలుస్తుండటంతో ఒత్తిడి గురై ఈ నెల 22న మృతి చెందారని ఆరోపించారు. ఇదిలా ఉండగా మధ్యవర్తులు జోక్యం చేసుకుని, ఆందోళన విరమింపజేశారు. అనుమానాస్పద మృతిగా పోలీసులు కేసు నమోదు చేశారు.ప్రాథమిక విచారణకే సోమరాజును స్టేషన్‌కు పిలిపించామని పోలీసులు చెప్పారు.