నకిలీ ఎస్సై గుట్టు రట్టు

నిందితుడిని అరెస్టు చేసిన రైల్వే పోలీసులు

పవన తిరుమలేష్‌

ఏలూరు నేరవార్తలు, న్యూస్‌టుడే : రైలులో హల్‌చల్‌ చేస్తున్న ఓ నకిలీ ఎస్సైను ఏలూరు రైల్వే పోలీసులు బుధవారం అరెస్టు చేశారు. వారు తెలిపిన వివరాలు... గుంటూరు సంగటిగుంటకు చెందిన చాగంటి పవన్‌ తిరుమలేష్‌ ఇంటర్‌ వరకు చదివాడు. తండ్రి నరసింహారావు ప్రైవేటు వ్యాపారి. తిరుమలేష్‌ ఇంటర్‌తో చదువు ఆపి చెడు వ్యసనాలకు బానిసయ్యాడు. సులభంగా డబ్బు సంపాదించాలని గుంటూరు, విజయవాడ ప్రాంతాల్లో పలు ద్విచక్ర వాహనాలు చోరీ చేశాడు. ఇతనిపై ఆయా పోలీసుస్టేషన్లలో కేసులున్నాయి. ప్రయాణికులను బెదిరించి డబ్బు దండుకోవచ్చనే ఉద్దేశంతో ఎస్సై దుస్తులు ధరించి విజయవాడ నుంచి విశాఖ వెళ్లే రైల్లో ప్రయాణిస్తుండగా ఏలూరులో రైల్వే పోలీసులకు ఇతని ప్రవర్తనపై అనుమానం వచ్చింది. పొడుగ్గా లేకపోవడం, అనుమానాస్పదంగా కనిపించడంతో విచారించగా అసలు విషయం బయటపడింది. దీంతో అతడిని అరెస్టు చేశారు.