ట్రాఫిక్‌లో ఇరుక్కున్న మాజీ ముఖ్యమంత్రి

2:30 గంటలపాటు ట్రాఫిక్‌లోనే ఉన్న కిరణ్‌కుమార్‌రెడ్డి

జంగారెడ్డిగూడెం, న్యూస్‌టుడే : ఉమ్మడి ఆంధ్రప్రదేశ్‌ మాజీ ముఖ్యమంత్రి నల్లారి కిరణ్‌కుమార్‌రెడ్డి బుధవారం రాత్రి జంగారెడ్డిగూడెం - కొయ్యలగూడెం రహదారిలో ట్రాఫిక్‌లో చిక్కుకున్నారు. ఏలూరు జిల్లా కాంగ్రెస్‌ పార్టీ అధ్యక్షుడు జెట్టి గురునాధరావు కుమారుడి వివాహ వేడుకలకు హాజరయ్యేందుకు జంగారెడ్డిగూడెం వెళ్తూ రాత్రి 9 నుంచి 11:30 గంటల వరకు ఈయన వాహనం ట్రాఫిక్‌లో ఉండిపోయింది. మాజీ ముఖ్యమంత్రి పర్యటన ఉందని తెలిసినా పోలీసులు ముందస్తు చర్యలు తీసుకోలేదు. లారీలు, బస్సులు, కార్లు, ఇతర వాహనాలు రెండు మూడు వరుసలుగా ఆగిపోయాయి. ద్విచక్ర వాహనదారులు ప్రయాణించే వీలు లేనంతగా నిలిచిపోయాయి.

నేతలతో మాటా మంతీ..

అంతకముందు కిరణ్‌కుమార్‌ రెడ్డి జంగారెడ్డిగూడెం రాజులకాలనీలోని ఒక అతిథి గృహంలో బసచేశారు. అక్కడ కేంద్ర మాజీ మంత్రి పల్లంరాజు, మాజీ మంత్రి పితాని సత్యనారాయణ తదితరులతో ముచ్చటించారు.