అక్రమ వసూళ్లకు అడ్డుకట్ట వేయాలి: జనసేన

సిద్ధాంతంలో ఇసుక లారీలను అడ్డుకుంటున్న నాయకులు

పెనుగొండ గ్రామీణ, న్యూస్‌టుడే: గోదావరి పక్కన ఉన్న కేదారేశ్వరస్వామి ఆలయ టోల్‌గేట్‌ పేరుతో అక్రమ వసూళ్లు చేస్తున్నారంటూ జనసేన నాయకులు గురువారం సిద్ధాంతం టోల్‌గేట్‌ వద్ద ఇసుక లారీలను అడ్డుకుని ఆందోళన చేశారు. ఈ సందర్భంగా మండల నాయకుడు కంబాల బాబులు మాట్లాడుతూ సిద్ధాంతం గోదావరి తీరాన ప్రసిద్ధ ఆలయాలు ఉన్నాయని, సుదూర ప్రాంతాల నుంచి నిత్యం పదుల సంఖ్యలో భక్తులు వస్తుంటారన్నారు. శ్మశానం కూడా ఉండటంతో వివిధ మండలాల నుంచి అంత్యక్రియల నిమిత్తం మృతదేహాలను తీసుకొచ్చే వారు గేటు కారణంగా నానా అవస్థలు పడుతున్నారని తెలిపారు. గ్రామ పంచాయతీకి ఆదాయం దక్కకుండా ప్రజాప్రతినిధులు, అధికారుల అండదండలతో అక్రమ వసూళ్లకు పాల్పడుతున్న వారిపై చర్యల తీసుకోవాలని కోరారు. లేదంటే ఆందోళన ఉద్ధృతం చేస్తామని హెచ్చరించారు. సర్పంచి చింతపల్లి గనిరాజు, బొబ్బిలి శ్రీను తదితరులు పాల్గొన్నారు.