బస్సు ఢీకొని యువకుడి దుర్మరణం

పోలవరం, న్యూస్‌టుడే: ద్విచక్రవాహనంపై ఇంటికి తిరిగి వెళ్తుతుండగా ఆర్టీసీ బస్సు ఢీకొనడంతో యువకుడు మరణించిన ఘటన పోలవరంలో చోటుచేసుకుంది. పోలీసుల కథనం ప్రకారం..పోలవరం పంచాయతీ పరిధిలోని యానాదిగూడేనికి చెందిన షేక్‌ శ్రీనుబాబు (33) మంగళవారం రాత్రి ద్విచక్రవాహనంపై ఇంటికి వెళుతున్నారు. పంచాయతీ కార్యాలయం వద్ద వెనుక నుంచి వస్తున్న కొవ్వూరు డిపోకు చెందిన ఆర్టీసీ బస్సు ఢీకొనడంతో తలకు గాయమై అక్కడికక్కడే మరణించారు. మృతదేహాన్ని పోలవరం సామాజిక ఆరోగ్యకేంద్రానికి తరలించారు. శ్రీనుబాబుకు ఏడాది కిందటే వివాహమైంది. నాలుగు నెలల పాప ఉంది. ప్రమాదం జరిగిందన్న విషయం తెలిసి అక్కడకు వచ్చిన శ్రీనుబాబు తల్లి కుమారుడి మృతదేహాన్ని చూసి స్పృహ తప్పి పడిపోవడంతో ఆమెను 108 వాహనంలో సామాజిక ఆరోగ్య కేంద్రానికి తరలించారు. ఎప్పుడు రద్దీగా ఉండే ప్రాంతంలో ఈ ఘటన చోటుచేసుకోవడంతో కొంతసేపు రాకపోకలకు అంతరాయం ఏర్పడింది. శ్రీనుబాబు మేనమామ షేక్‌ వెంకన్నసాహెబ్‌ ఇచ్చిన ఫిర్యాదుపై కేసు నమోదు చేసినట్లు ఎస్సై శ్రీను చెప్పారు.