ఉద్యోగం పేరిట మోసం

జంగారెడ్డిగూడెం పట్టణం, న్యూస్‌టుడే: ఉద్యోగం ఇప్పిస్తానని మోసగించడంతో బాధిత యువతి ఫిర్యాదు మేరకు కేసు నమోదు చేసినట్లు ఎస్సై సాగర్‌బాబు తెలిపారు. ఆయన కథనం ప్రకారం.. బుట్టాయిగూడెం మండలం నూతిరామన్నపాలెం గ్రామానికి చెందిన మడకం రాజ్యలక్ష్మి అనే యువతి పట్టణంలోని ఓ ప్రైవేటు ఆసుపత్రిలో నర్సుగా పనిచేస్తున్నారు. ఏలూరు ప్రభుత్వ ఆసుపత్రిలో సీనియర్‌ అసిస్టెంట్‌గా పనిచేస్తున్న సుందరపల్లి సత్యనారాయణ డీఎంహెచ్‌వో కోటాలో స్టాఫ్‌ నర్స్‌గా ఉద్యోగం ఇప్పిస్తానని రాజ్యలక్ష్మి వద్ద రూ.లక్ష తీసుకున్నారు. అనంతరం మొహం చాటేశాడు. దీంతో బాధితురాలు పోలీసులను ఆశ్రయించడంతో కేసు నమోదు చేసి, దర్యాప్తు చేస్తున్నట్లు ఎస్సై పేర్కొన్నారు.