ప్రభుత్వ విధానాలతో విద్యారంగానికి నష్టం : ఎమ్మెల్సీ

మాట్లాడుతున్న సాబ్జీ

ఏలూరు విద్యా విభాగం, న్యూస్‌టుడే: రాష్ట్ర ప్రభుత్వం అనుసరిస్తున్న విధానాలతో విద్యారంగానికి నష్టం వాటిల్లుతోందని ఎమ్మెల్సీ షేక్‌ సాబ్జీ అన్నారు. స్థానిక యూటీఎఫ్‌ జిల్లా కార్యాలయంలో సోమవారం నిర్వహించిన సమావేశంలో ఆయన ముఖ్య అతిథిగా మాట్లాడుతూ ఉపాధ్యాయుల బోధనకు ఇబ్బంది కలిగిస్తోన్న పలు రకాల యాప్‌లను రద్దు చేయాలన్నారు. నూతన విద్యా విధానం పేరుతో ప్రాథమిక పాఠశాలలను విలీనం చేయడంతో అనేకమంది పేద విద్యార్థులు నష్టపోయే పరిస్థితి నెలకొందన్నారు. యూటీఎఫ్‌ రాష్ట్ర అధ్యక్షుడు ఎన్‌.వెంకటేశ్వరరావు మాట్లాడుతూ ప్రభుత్వ బడుల్లో ఖాళీగా ఉన్న ఉపాధ్యాయ కొలువులను భర్తీ చేయాలని డిమాండ్‌ చేశారు. ఉపాధ్యాయులపై పనిభారాన్ని తగ్గించాలన్నారు. సమావేశంలో సంఘ నాయకులు రవికుమార్‌, నరసింహారావు తదితరులు పాల్గొన్నారు.