ధాన్యం బకాయిలు ఎప్పుడిస్తారు?

ముట్టడిలో పాల్గొన్న రైతులు, నాయకులు

భీమవరం పట్టణం, న్యూస్‌టుడే:  ఖరీఫ్‌ ధాన్యం విక్రయించి నాలుగు నెలలు గడిచినా నగదు రాలేదంటూ పలువురు రైతులు భీమవరంలోని జిల్లా పౌరసరఫరాల కార్యాలయాన్ని మంగళవారం ముట్టడించి నిరసన తెలిపారు. ఏపీ కౌలు రైతుల సంఘం జిల్లా కార్యదర్శి మామిడిశెట్టి రామాంజనేయులు మాట్లాడుతూ రైతుల సమస్యలను ప్రభుత్వం, ప్రజాప్రతినిధులు పట్టించుకోవడం లేదన్నారు. జిల్లాలో ఇంకా 3 వేల మందికి సొమ్ము రావాల్సి ఉందన్నారు. బకాయిలు వెంటనే విడుదలయ్యేలా చూడాలని నాయకులు యాళ్లబండి ఉమామహేశ్వరరావు, నేదూరి వెంకటేశ్వరరావు తదితరులు డిమాండ్‌ చేశారు. రైతుల ఆందోళనపై అధికారులు జేసీ మురళికి సమాచారం ఇవ్వడంతో వారంలోపు బకాయిలు చెల్లిస్తామని ఆయన హామీ ఇచ్చినట్లు నాయకులు తెలిపారు.