విభజన హామీలు తక్షణమే అమలు చేయాలి

ఏలూరు వన్‌టౌన్‌, న్యూస్‌టుడే: రాష్ట్రానికి ప్రత్యేక హోదా ఇవ్వాలని, విభజన హామీలు అమలు చేయాలని ఏలూరులోని పాతబస్టాండు కూడలి అంబేడ్కర్‌ విగ్రహం వద్ద ప్రత్యేక హోదా సాధన సమితి ఆధ్వర్యంలో సంఘీభావంగా నిరసన కార్యక్రమం నిర్వహించారు. ఈ సందర్భంగా సమితి జిల్లా కో కన్వీనర్‌ బండి వెంకటేశ్వరరావు మాట్లాడుతూ రాష్ట్ర విభజన సందర్భంగా ఇచ్చిన హామీలను తక్షణమే అమలు చేయాలన్నారు. సీపీఐ జిల్లా కార్యదర్శి మన్నవ కృష్ణ చైతన్య మాట్లాడుతూ రాజ్యాంగంలో పొందుపరిచినట్లుగా రాష్ట్రం హక్కులను సాధించడంలో సీఎం జగన్‌మోహన్‌రెడ్డి విఫలమయ్యారన్నారు. రాష్ట్ర ప్రయోజనాల కోసం సీపీఐ, ఇతర వామపక్షాలు, ప్రత్యేక హోదా సాధన సమితి ఐక్యంగా ఉద్యమించాలని పిలుపునిచ్చారు. కార్యక్రమంలో నాయకులు కిషోర్‌, హేమశంకర్‌, కన్నబాబు, భాస్కరరావు తదితరులు పాల్గొన్నారు.