సాగిపాడులో ఇంటర్‌ విద్యార్థి హత్య

పాత గొడవల నేపథ్యంలో కత్తితో దాడి

సిద్ధార్థ (పాత చిత్రం)

సాగిపాడు (కామవరపుకోట), న్యూస్‌టుడే: పాత గొడవల నేపథ్యంలో ఇంటర్‌ విద్యార్థిపై  యువకుడు కత్తితో దాడి చేసి హతమార్చిన ఘటన కామవరపుకోట మండలం సాగిపాడులో చోటుచేసుకుంది. ఈ ఘటన గ్రామంలో కలకలం రేపింది. పోలీసుల కథనం మేరకు.. గ్రామానికి చెందిన సిద్దార్థ(18) ఇంటర్‌ చదువుతున్నాడు. ఇతడికి, అదే ఊరికి చెందిన బి.నాగరాజుకు మధ్య నెలరోజుల కిందట ఓ విషయమై వాగ్వాదం జరిగింది. ఈ నేపథ్యంలో శనివారం సాయంత్రం ఏలూరులోని కళాశాలకు వెళ్లి ఇంటికి వచ్చిన సిద్ధార్థ.. గ్రామంలోని ప్రధాన బజారులో నడుచుకుంటూ వస్తుండగా మద్యం తాగి ఉన్న నాగరాజు కత్తితో తొలుత తలపై, అనంతరం మెడపై దాడి చేశాడు.  సిద్ధార్థ అక్కడికక్కడే కుప్పకూలిపోయి మృతిచెందాడు. ఊహించని రీతిలో జరిగిన ఈ ఉదంతంతో స్థానికులు భయాందోళనలకు గురయ్యారు. మృతదేహాన్ని పరీక్ష నిమిత్తం ఏలూరు ప్రభుత్వాసుపత్రికి తరలించి, కేసు నమోదు చేసి దర్యాప్తు చేస్తున్నట్లు తడికలపూడి ఎస్సై కె.వెంకన్న తెలిపారు.