చంద్రబాబు పర్యటన విజయవంతం చేయాలి

దెందులూరు : ‘ఇదేం ఖర్మ- రాష్ట్రానికి’ ద్వారా దెందులూరు నియోజకవర్గానికి విచ్చేస్తున్న తెదేపా జాతీయాధ్యక్షులు, మాజీ సీఎం నారా చంద్రబాబు కార్యక్రమాన్ని విజయవంతం చేయాలని దెందులూరు మాజీ ఎమ్మెల్యే చింతమనేని ప్రభాకర్‌ సూచించారు. తెదేపా నాయకులు కార్యకర్తలు సమీకరణలో భాగంగా దెందులూరు నియోజవర్గంలోని మల్కాపురం, కొవ్వలి, దోసపాడు, పోతునూరు, దెందులూరు తదితర గ్రామాల్లో ఆదివారం పర్యటించారు. ఈ సందర్భంగా ఆయన మాట్లాడుతూ రాష్ట్రంలో నెలకొన్న పరిస్థితులపై చంద్రబాబు చేపట్టిన ఈ కార్యక్రమం దెందులూరు నియోజకవర్గంలో ప్రారంభించడానికి వస్తున్న నేపథ్యంలో పార్టీ నాయకులు, కార్యకర్తలు ప్రతి ఒక్కరూ హాజరై విజయవంతం చేయాలని సూచించారు. అదేవిధంగా మహిళలు కూడా పెద్ద సంఖ్యలో హాజరయ్యేలా నాయకులు కార్యకర్తలు తగిన చర్యలు తీసుకోవాలన్నారు. ఆయన వెంట మండల పార్టీ అధ్యక్షులు మాగంటి నారాయణ ప్రసాద్‌, బి.సుధాకర్‌, గ్రామ పార్టీ అధ్యక్షులు కార్యదర్శులు ఉన్నారు.