కొల్లేరు అతిథి అరుదైన పక్షి.. తెడ్డుమూతి కొంగ

కైకలూరు గ్రామీణం, న్యూస్‌టుడే: ఆకర్షణీయమైన మూతితో పక్షి ప్రేమికులను విశేషంగా ఆకట్టుకునే విహంగం తెడ్డుమూతి కొంగ (యూరేషియన్‌ స్పూన్‌బిల్‌). ఇది కొంగ ఆకారంలో ఉండి 80 నుంచి 90 సెం.మీ. పొడవు, ఒకటి నుంచి 2 కిలోల బరువు ఉంటుంది. ఆహారం కోసం కొల్లేరుకు వలస వస్తుంటాయి. శరీరం తెలుపు వర్ణంలో, కాళ్లు, ముక్కు నలుపు రంగులో ఉంటాయి. ఆర్కిటిక్‌ ప్రాంతంలో చలి తీవ్రత కారణంగా మనదేశంతో పాటు చైనా, జపాన్‌, ఆఫ్రికా దేశాలకు వలస వస్తుంటాయి. మంచినీటి వసతి ఉన్న ప్రాంతాల్లో ఆవాసాలు ఏర్పాటు చేసుకుంటాయి. ప్రస్తుతం కొల్లేరులో 200 వరకు ఈ రకం పక్షులు ఉంటాయని అటవీ శాఖ అధికారులు తెలిపారు.