అందరికీ ఆత్మీయుడు అంబేడ్కర్‌

భీమవరంలో కాంస్య విగ్రహం ఆవిష్కరణ

ఆవిష్కరించిన విగ్రహం వద్ద మండలి ఛైర్మన్‌ మోసేనురాజు, మంత్రులు కొట్టు, కారుమూరి, ఎమ్మెల్యే గ్రంధి తదితరులు

భీమవరం గునుపూడి, న్యూస్‌టుడే: భారత రాజ్యాంగ నిర్మాత డాక్టర్‌ బీఆర్‌ అంబేడ్కర్‌ అన్ని వర్గాల వారికి ఆత్మీయుడని ఉప మఖ్యమంత్రి కొట్టు సత్యనారాయణ, మంత్రి కారుమూరి వెంకటనాగేశ్వరరావు అన్నారు. భీమవరం గునుపూడిలో అంబేడ్కర్‌ కాంస్య విగ్రహాన్ని శాసనమండలి ఛైర్మన్‌ కొయ్యే మోసేనురాజు, భీమవరం ఎమ్మెల్యే గ్రంధి శ్రీనివాస్‌లతో కలిసి సోమవారం వారు ఆవిష్కరించారు. ఈ సందర్భంగా వారు మాట్లాడుతూ ప్రపంచం గర్వించదగిన మేధావి అంబేడ్కర్‌ అని కొనియాడారు. తొలుత మండలి ఛైర్మన్‌ మోసేనురాజు జన్మదినోత్సవాన్ని పురస్కరించుకొని ఆయనతో ఆర్యవైశ్య వర్తక సంఘాల ఆధ్వర్యంలో భారీ కేకు కోయించారు. అక్కడి నుంచి ప్రకాశంచౌక్‌ మీదుగా అశ్వరథంపై ఊరేగింపుగా ఆదివారం బజార్‌లోని పొట్టిశ్రీరాములు విగ్రహం వద్దకు చేరుకుని నివాళులర్పించారు. అనంతరం గునుపూడిలో అంబేడ్కర్‌ విగ్రహాన్ని ఆవిష్కరించారు. ఈ సందర్భంగా అభిమానులు మోసేనురాజును పూలమాలలు, పుష్పగుచ్ఛాలతో సత్కరించారు.