మొగల్తూరు సబ్‌రిజిస్ట్రార్‌ అరెస్టు

మొగల్తూరు, న్యూస్‌టుడే: మొగల్తూరు సబ్‌రిజిస్ట్రార్‌ జీవన్‌బాబును అరెస్టు చేశామని సీఐ వి.సురేష్‌బాబు గురువారం తెలిపారు. ఆయన తెలిపిన వివరాల ప్రకారం.. మొగల్తూరు సబ్‌రిజిస్ట్రార్‌ కార్యాలయంలో నిషేధిత భూముల రిజిస్ట్రేషన్లు జరిగిన విషయాన్ని రెవెన్యూ అధికారులు గుర్తించారు. గత నెల 25న సబ్‌ కలెక్టర్‌ సూర్యతేజ, తహశీల్దారు జి.అనితాకుమారి, సిబ్బంది సబ్‌రిజిస్ట్రార్‌ కార్యాలయంలో దస్త్రాలు, కంప్యూటర్‌ సమాచారాన్ని తనిఖీ చేశారు. మరుసటి రోజు జిల్లా రిజిస్ట్రార్‌ ఆర్‌.సత్యనారాయణ కార్యాలయంలో దస్త్రాలను పరిశీలించి 48 రిజిస్ట్రేషన్లు నిబంధనలకు విరుద్ధంగా జరిగినట్లు నిర్ధరించారు. ఈ మేరకు ఉన్నతాధికారులకు నివేదిక అందించారు. దీంతో ఈ నెల 28న ఆ శాఖ ఉన్నతాధికారులు జీవన్‌బాబును సస్పెండ్‌ చేస్తూ ఉత్తర్వులు జారీ చేశారు. ఈ క్రమంలో కలెక్టర్‌ పి.ప్రశాంతి ఆదేశాలతో తహశీల్దారు జి.అనితాకుమారి ఇచ్చిన ఫిర్యాదు మేరకు ఎస్సై ఎం.వీరబాబు కేసు నమోదు చేశారు. ఈ కేసులో సబ్‌రిజిస్ట్రార్‌ను అరెస్టు చేసి కోర్టులో హాజరుపరచగా రిమాండు విధించారని సీఐ తెలిపారు.