కనువిందు చేస్తున్న మార్ష్‌ శాండ్‌పైపర్‌

కొల్లేరు అతిథి

కైకలూరు గ్రామీణం, న్యూస్‌టుడే: చిత్తడి నేలలకు నెలవైన కొల్లేరుకు వలస వచ్చే విశిష్ట అతిథి మార్ష్‌ శాండ్‌పైపర్‌. ఇది 45- 120 గ్రాముల బరువు కలిగి ఉంటుంది. సన్నటి సూది లాంటి పొడవైన ముక్కుతో చూపరులను ఆకట్టుకుంటూ వేసవి, వర్షాకాలాల్లో బూడిద, గోధుమ వర్ణంలోనూ, శీతాకాలంలో పాలినట్లుగా కనిపిస్తుంది. రెక్కల కింది నుంచి పొట్ట, తోక వరకు తెలుపు, కాళ్లు ఎరుపు, మెడ, ఛాతి భాగంలో గోధుమ రంగు చుక్కలతో కనువిందు చేస్తాయి. ఈ పక్షులు ఎక్కువగా ఆర్కిటిక్‌, మధ్య ఆసియా ప్రాంతాల నుంచి దక్షిణ ధ్రువం వైపు వలస వస్తాయి. శీతాకాలంలో మనదేశంతో పాటు ఆఫ్రికా, చైనా, కొరియా, ఆస్ట్రేలియా దేశాలకు ఆహారం కోసం వేల కిలోమీటర్లు ఎగురుకుంటూ వస్తాయి. మంచినీరు లభించే చిత్తడి నేలలు, నదులు, సరస్సుల్లో చిన్న గుంపులుగా చేరి ఫిబ్రవరి, మార్చి నెల వరకు ఉండి తిరిగి వెళ్లిపోతాయి. చిన్న చేపలు, పురుగులు, వానపాములు, చిట్టినత్తలను ఆహారంగా తీసుకుంటాయి. ప్రస్తుతం కొల్లేరులో 400 వరకు ఈ పక్షులు ఉంటాయని అటవీ శాఖ అధికారులు తెలిపారు.