పురపాలక స్థలం పరాధీనం!

రూ.కోట్ల విలువైన భూమిలో ప్రైవేటు లేఅవుట్‌

ప్రభుత్వ స్థలంలో  రహదారి, హద్దులకు నిర్మించిన కాంక్రీటు స్తంభాలు

నరసాపురం, న్యూస్‌టుడే: నరసాపురం పురపాలక పరిధిలో రూ.కోట్ల విలువైన స్థలం కబ్జాకు గురవుతున్నా టౌన్‌ ప్లానింగ్‌ అధికారులు పట్టనట్టు వ్యవహరిస్తున్నారని కౌన్సిలర్లు ఆరోపిస్తున్నారు. పట్టణంలోని 25వ వార్డు ఆదర్శనగర్‌ కాలనీని సుమారు పదేళ్ల కిందట ఏర్పాటు చేశారు. ఆ సమయంలో పేదలకు పంపిణీ చేసిన స్థలాల్లో లబ్ధిదారులు ఇళ్లు నిర్మించుకుని వాటిలోనే నివసిస్తున్నారు. పంపిణీ చేయగా సుమారు ఇరవై సెంట్ల స్థలం మిగిలి ఉంది. ఆ స్థలానికి చుట్టూ రక్షణ కంచె ఏర్పాటు చేయకపోవడంతో కబ్జాకు గురైంది. ఈ ప్రాంతంలో సెంటు ధర సుమారు రూ.8 లక్షల వరకు ఉంటుందని.. ఆక్రమణకు గురైన స్థలం విలువ రూ.1.50 కోట్లు ఉంటుందని స్థానికులు చెబుతున్నారు. ఇటీవల మిగులు స్థలానికి సమీపంలో ఉన్న ప్రైవేటు భూమిని కలిపి యజమానులు ప్లాట్లుగా విభజించారు. ఆ ప్లాట్లకు వెళ్లేందుకు ప్రభుత్వ స్థలంలో రహదారి నిర్మించారు. అక్కడితో వదలకుండా ప్రభుత్వ స్థలాన్ని కూడా విక్రయించారు. కొనుగోలు చేసిన వ్యక్తులు దాని సరిహద్దుల్లో కాంక్రీటుతో స్తంభాలు నిర్మించుకున్నారు. ఈ విషయమై కౌన్సిలర్‌ వన్నెంరెడ్డి శ్రీనివాస్‌ మంగళవారం నాటి పురపాలక సమావేశంలో అధికారులను నిలదీశారు. దీనిపై ‘న్యూస్‌టుడే’ టౌన్‌ ప్లానింగ్‌ అధికారి శేషగిరిని సమాచారం కోరగా ఆక్రమణలను వెంటనే తొలగించి, ఆ స్థలాన్ని స్వాధీనం చేసుకునేందుకు చర్యలు చేపడతామని వెల్లడించారు.