బాలుడి గాయం మానుతుందంటూ పెట్రోల్‌ పోసి నిప్పంటించారు!

కార్తిక్‌ను పరామర్శిస్తున్న ఆర్డీవో ఝాన్సీరాణి తదితరులు

జంగారెడ్డిగూడెం పట్టణం, జంగారెడ్డిగూడెం, న్యూస్‌టుడే: ఓ బాలుడి కాలికి అయిన గాయం మానుతుందంటూ దానిపై ఇద్దరు యువకులు పెట్రోల్‌ పోసి నిప్పంటించిన ఘటన  జంగారెడ్డిగూడెంలో ఆలస్యంగా వెలుగు చూసింది. స్థానిక ప్రాంతీయ ఆసుపత్రిలో చికిత్స పొందుతున్న జంగారెడ్డిగూడెం మండలం శ్రీనివాసపురానికి చెందిన బాధిత బాలుడు తగరం కార్తిక్‌ పరిస్థితిని కొందరు కలెక్టర్‌ ప్రసన్న వెంకటేశ్‌ దృష్టికి తీసుకెళ్లారు. ఆయన ఆదేశాల మేరకు జరిగిన ఘటనపై ఆర్డీవో ఝాన్సీరాణి మంగళవారం రాత్రి విచారణ చేపట్టి.. బాలుడు, అతడి తల్లి రామలక్ష్మి నుంచి వివరాలు సేకరించారు. గతంలో కార్తిక్‌ తల్లిదండ్రులతో కలిసి జీడి గింజల పరిశ్రమలో పనిచేసేవారు. ఐదురోజుల నుంచి జంగారెడ్డిగూడెంలోని ఓ పకోడీ దుకాణంలో పనికి వెళుతున్నాడు. అప్పటికే అతడి కాలికి గాయం ఉంది. ఆదివారం రాత్రి తాండ్ర పాపారాయుడు విగ్రహం ప్రాంతంలో పకోడి దుకాణదారుడి ఇంటి వద్ద తన గాయం తగ్గుతుందంటూ నాగు, ఖాసిం అనే యువకులు పెట్రోలు పోసి నిప్పంటించారని అధికారులకు తెలిపాడు. అనంతరం తనను ఇంటి వద్ద దించి విషయం ఎవరికైనా చెబితే చంపేస్తామని బెదిరించారని చెప్పాడు. మరోవైపు బాలుడికి అయిన గాయం తీవ్రం కావడంతో మెరుగైన వైద్యం కోసం ఏలూరు తరలించారు. తాను దుకాణంలో ఉండగా వేడి నూనె ఒంటిపై పడటంతో గాయమైందని ఆసుపత్రిలోని పోలీసులకు సోమవారం కార్తిక్‌ ఫిర్యాదు చేశాడని జంగారెడ్డిగూడెం పట్టణ ఎస్సై సాగర్‌బాబు తెలిపారు.