ఆశాలతో ఆన్‌లైన్‌ పనులు చేయించొద్దు

డీఎంహెచ్‌వో కార్యాలయం ముందు ధర్నా చేస్తున్న కార్యకర్తలు

ఏలూరు టూటౌన్‌, న్యూస్‌టుడే: ఆశా కార్యకర్తలతో వారికి సంబంధం లేని ఆన్‌లైన్‌ పనులు చేయించొద్దని, ఏళ్లుగా వైద్య ఆరోగ్య శాఖకు సేవలందిస్తున్న వారి సమస్యలు పరిష్కరించాలని ఆశా వర్కర్ల సంఘ రాష్ట్ర అధ్యక్షురాలు పోశమ్మ డిమాండ్‌ చేశారు. ఏలూరులోని డీఎంహెచ్‌వో కార్యాలయం వద్ద మంగళవారం ఆశాలు నిర్వహించిన  ధర్నాలో ఆమె మాట్లాడారు. గత 15 ఏళ్లుగా ఎనలేని సేవలందిస్తున్నా ప్రభుత్వం  చిన్నచూపు చూస్తోందన్నారు. జాతీయ ఆరోగ్య మిషన్‌ నిబంధనలకు విరుద్ధంగా సచివాలయాలకు అనుసంధానం చేసి 3 వేల నుంచి 5 వేల జనాభాకు ఒక్కో ఆశా కార్యకర్తను కేటాయించడం దారుణమన్నారు. సర్వేల పేరుతో నెలకు మూడు సార్లు  రికార్డులు రాయిస్తున్నారని, వచ్చే వేతనంలో సగంఖర్చులకే సరిపోతోందని తెలిపారు. ప్రభుత్వమిచ్చిన ఫోన్లు పనిచేయకపోయినా సొంతంగా కొనుక్కుని పనులు చేయాలని అధికారులు బెదిరిస్తున్నారని, దీన్ని వెంటనే ఆపాలన్నారు. అనంతరం ఇన్‌ఛార్జి  డీఎంహెచ్‌వో నాగేశ్వరరావుకు వినతిపత్రం అందించారు. సీఐటీయూ జిల్లా అధ్యక్ష ప్రధాన కార్యదర్శులు డీఎన్‌వీడీ ప్రసాద్‌, ఆర్‌.లింగరాజు తదితరులు మాట్లాడారు. నాయకులు విజయలక్ష్మి, కమల, రోజా, కామేశ్వరి, దేవి తదితరులు పాల్గొన్నారు.