బాల్య వివాహాలు జరిగితే కఠిన చర్యలు

సంక్షేమ శాఖల అధికారులకు మాట్లాడుతున్న కలెక్టర్‌

భీమవరం అర్బన్‌, న్యూస్‌టుడే: ఎక్కడైనా బాల్య వివాహాలు జరిగితే సంబంధిత అధికారులపై కఠిన చర్యలు తప్పవని కలెక్టర్‌ ప్రశాంతి హెచ్చరించారు. ఐసీడీఎస్‌ అధికారులతో శుక్రవారం నిర్వహించిన సమావేశంలో కలెక్టర్‌ మాట్లాడారు. మీకు తెలియకుండా బాల్య వివాహాలు ఎలా జరుగుతున్నాయంటూ ఒకింత ఆగ్రహం వ్యక్తం చేశారు. బాధ్యులపై పోక్సో చట్టం కింద ఎందుకు చర్యలు తీసుకోవడం లేదని ప్రశ్నించారు. ఇక ముందు ఒక్క బాల్య వివాహం జరిగినా తీవ్ర పరిణామాలు ఉంటాయని హెచ్చరించారు.

* వసతి గృహాలను నిబంధనల ప్రకారం నిర్వహించాలని కలెక్టర్‌ ప్రశాంతి సంబంధిత శాఖాధికారులకు స్పష్టం చేశారు. తన ఛాంబర్‌లో అధికారులతో శుక్రవారం సమావేశం నిర్వహించి మాట్లాడారు. చాలా చోట్ల విద్యార్థులకంటే సిబ్బంది ఎక్కువగా ఉంటున్నారన్నారు. అలాంటి వారిని మిగిలిన కార్యాలయాల్లో విధులకు కేటాయించాలని ఆదేశించారు. వసతి గృహాల్లో చేరికలు పెరిగేలా దృష్టి సారించాలని సూచించారు.