అగ్నిగుండానికి పోటెత్తిన భక్తులు

దెందులూరు: దెందులూరు మండలం గాలయగూడెంలోని అచ్చమ్మ పేరంటాలు తల్లి ఆలయంలో ఆదివారం ఏర్పాటు చేసిన అగ్నిగుండం ప్రవేశం కార్యక్రమానికి పలు ప్రాంతాల నుంచి భక్తులు పోటెత్తారు. ఉదయం అమ్మవారికి ప్రత్యేక అలంకరణ చేసి కుంకుమ పూజ నిర్వహించారు. అనంతరం ఆలయం ప్రాంగణంలో ప్రత్యేకంగా ఏర్పాటు చేసిన అగ్నిగుండంలో పూజారి సతీష్ అనే యువకుడు తొలిసారి అమ్మవారి విగ్రహాన్ని పట్టుకొని నిప్పుల్లో నడిచాడు. భక్తులు అగ్నిగుండంలో నడిచి అమ్మవారిని దర్శించుకున్నారు. ఆలయ కమిటీ సభ్యుల పర్యవేక్షణలో జరిగిన కార్యక్రమానికి పోలీసులు ప్రత్యేక బందోబస్తు ఏర్పాటు చేశారు.