అజాత శత్రువుకు అంతిమ వీడ్కోలు

నారాయణస్వామికి ఘన నివాళులు

యర్రా పార్థివ దేహంపై పుష్పగుచ్ఛం ఉంచుతున్న మంత్రి కొట్టు సత్యనారాయణ

ఉండి, న్యూస్‌టుడే: రాజకీయాల్లో అజాత శత్రువు, మితభాషి, విలువలకు కట్టుబడిన పెద్దాయనగా గుర్తింపు పొందిన మాజీ మంత్రి యర్రా నారాయణస్వామి (బెనర్జీ) పార్థివ దేహాన్ని కడసారి చూసేందుకు గురువారం ఉప్పులూరు గ్రామానికి పలువురు ప్రముఖులు తరలివచ్చారు. ఘనంగా నివాళులు అర్పించి అంతిమ వీడ్కోలు పలికారు. పంచాయతీ సర్పంచి నుంచి రాజ్యసభ సభ్యునిగా ప్రాతినిథ్యం వహించి ఆ పదవులకు వన్నె తెచ్చిన నారాయణస్వామి బుధవారం సాయంత్రం కన్ను మూసిన విషయం తెలిసిందే. ఉప్పులూరులోని ఆయన స్వస్థలానికి పార్థివ దేహాన్ని తరలించారనే సమాచారం అందుకున్న వెంటనే రాష్ట్ర నలుమూలల నుంచి తెదేపా, వైకాపా, జనసేన, సీపీఎం, సీపీఐ, రైతు సంఘాల నాయకులు, ప్రజాప్రతినిధులు, అభిమానులు అధిక సంఖ్యలో తరలివచ్చి ఘనంగా నివాళులర్పించారు.

పూలమాల వేస్తున్న పుల్లారావు, తెదేపా నాయకులు