ఆక్రమణల తొలగింపులో రాజీ వద్దు: కలెక్టర్‌

పురపాలక అధికారులకు సూచనలిస్తున్న ప్రశాంతి

భీమవరం పట్టణం, న్యూస్‌టుడే: పట్టణంలో అభివృద్ధి అనేది మాటల్లో కాకుండా ఆచరణలో చూపాలని కలెక్టర్‌ పి.ప్రశాంతి అధికారులకు సూచించారు. భీమవరంలోని పలు ప్రాంతాల్లో గురువారం ఆకస్మికంగా పర్యటించారు. అండర్‌పాస్‌ సమీపంలో ఫుడ్‌ కోర్టు ఏర్పాటుకు స్థలాన్ని పరిశీలించాలన్నారు. లంకపేట పరిధిలో ఆక్రమణలు తొలగించిన ప్రాంతాన్ని చూశారు. సోమగుండం చెరువు ఆధునికీకరణ పనులు వేగవంతం చేయాలని అధికారులను ఆదేశించారు. పట్టణంలో ట్రాఫిక్‌ ఇబ్బందులు లేకుండా చూడాలని, ఆక్రమణల తొలగింపు విషయంలో రాజీ పడొద్దని సూచించారు. రహదారుల పక్కన పేవర్‌బ్లాక్‌లు పూర్తికానిచోట వెంటనే పనులు చేయాలన్నారు. కమిషనర్‌ ఎస్‌.శివరామకృష్ణ, డీఈ టి.వి.నారాయణరావు, టీపీవో సీతారామయ్య తదితరులు పాల్గొన్నారు.