అనుమతులు లేని వైద్యశాల సీజ్‌

వైద్యశాలను తనిఖీ చేస్తున్న అధికారులు

పూళ్ల (భీమడోలు), న్యూస్‌టుడే: భీమడోలు మండలం పూళ్ల గ్రామంలో ఎటువంటి అనుమతులు, అర్హత లేకుండా పీఎంపీ నిర్వహిస్తున్న వైద్యశాలను వైద్య, ఆరోగ్యశాఖాధికారులు శుక్రవారం సీజ్‌ చేశారు. పూళ్ల గ్రామంలో వినాయకుడి గుడి సమీపంలో పెనుగొండ శ్రీనివాసరావు అనే పీఎంపీ అనుమతులు లేకుండా వైద్యశాల నిర్వహిస్తూ... అధిక ధరలకు  ఔషధాలు విక్రయిస్తున్నారంటూ ఎం.ఎం.పురం గ్రామానికి చెందిన బిరుదుగడ్డ నరేష్‌ ఇటీవల ‘స్పందన’ కార్యక్రమంలో వైద్యశాఖాధికారులకు ఫిర్యాదు చేశారు. దీనిపై స్పందించిన డీఎంహెచ్‌వో ఆశా ఆదేశాల మేరకు స్థానిక పీహెచ్‌సీ వైద్యాధికారి లీలాప్రసాద్‌, ప్రైవేటు వైద్యశాలలను పర్యవేక్షించే రత్నకుమారి తదితరులు సంబంధిత వైద్యశాలను తనిఖీ చేశారు. అనుమతి లేకుండా వైద్యశాల నిర్వహిస్తున్నారని గుర్తించి సీజ్‌ చేశారు.