కలెక్టరేట్‌కు 20 ఎకరాల కేటాయింపు

వ్యవసాయ మార్కెట్‌ యార్డు కార్యాలయం

భీమవరం అర్బన్‌, న్యూస్‌టుడే:  జిల్లా కేంద్రం భీమవరంలో కలెక్టరేట్‌తో పాటు వివిధ ప్రభుత్వ శాఖల కార్యాలయాలను శాశ్వత ప్రాతిపదికన ఏర్పాటు చేసేందుకు స్థానిక వ్యవసాయ మార్కెట్‌ యార్డు ప్రాంగణంలో 20 ఎకరాలు కేటాయిస్తూ ప్రభుత్వం ఉత్తర్వులు జారీ చేసింది. ఇక్కడ బహుళ ప్రయోజన భవన సముదాయాన్ని నిర్మించే ప్రతిపాదన ఉన్నట్లు అధికారులు చెబుతున్నారు.
ఏడాదిలోపే.. జిల్లాల విభజన జరిగి ఏప్రిల్‌ 4వ తేదీకి ఏడాది పూర్తవుతుంది. జిల్లా కేంద్రంగా భీమవరం ఆవిర్భవించాక అద్దె భవనంలో తాత్కాలికంగా ఏర్పాటు చేసిన కలెక్టరేట్‌ ఊరికి దూరంగా ఉంది. అక్కడికి వెళ్లి రావడం సామాన్య ప్రజలతో పాటు ఉద్యోగులకు భారంగా మారింది. మార్కెట్‌ యార్డు పట్టణంలో జంక్షన్‌ రైల్వేస్టేషన్‌, ఆర్టీసీ బస్టాండ్‌, జాతీయ రహదారికి దగ్గరగా ఉంది. వీలైనంత త్వరగా ఇక్కడ శాశ్వత భవనాలు నిర్మిస్తే అందరికీ మేలు జరగనుంది. కలెక్టర్‌ ప్రశాంతి కృషి వల్లే ఏడాదిలోపు కలెక్టరేట్‌కు అనువైన స్థలం సమకూరిందని ఉద్యోగులు అభిప్రాయపడుతున్నారు. మార్కెట్‌ యార్డుకు విస్సాకోడేరులో మరో స్థలం కేటాయించనున్నట్లు సమాచారం.