నాడు-నేడు పనుల పరిశీలన

పెదపాడు కళాశాలలో పరిశీలిస్తున్న కలెక్టర్‌ ప్రసన్న వెంకటేశ్‌

ఏలూరు విద్యా విభాగం, పెదపాడు, న్యూస్‌టుడే: పెదపాడు, ఏలూరులోని ప్రభుత్వ జూనియర్‌ కళాశాలల్లో జరుగుతున్న నాడు-నేడు పనులను కలెక్టర్‌ ప్రసన్న వెంకటేశ్‌ పరిశీలించారు. ‘సమస్యలే తొలి పాఠాలు’ శీర్షికతో ‘ఈనాడు’లో శుక్రవారం ప్రచురితమైన కథనానికి ఆయన స్పందించారు. కలెక్టర్‌ పెదపాడు కళాశాలను సందర్శించి నాడు-నేడు పనుల తీరును పరిశీలించారు. కళాశాల ప్రధానాచార్యుడు సుబ్రహ్మణ్యం నాడు-నేడు పనుల వివరాలను తెలియజేశారు.  ఇప్పుడున్న నాలుగు తరగతి గదుల ఆధునికీకరణకు రూ.28.10 లక్షలు మంజూరు కాగా, రివాల్వింగ్‌ ఫండ్‌ కింద రూ.7.30 లక్షలను ఇప్పటివరకు ఖర్చు చేసినట్లు తెలిపారు. జూన్‌ నెలాఖరుకు పనులు పూర్తి చేయాలని కలెక్టర్‌ ఆదేశించారు. కార్యక్రమంలో తహసీల్దారు విజయకుమార్‌రాజు, ఏఈ సాయికృష్ణ తదితరులు పాల్గొన్నారు.ః  నగరంలోని ప్రభుత్వ జూనియర్‌ కళాశాలలో మరుగుదొడ్ల నిర్మాణ పనులతోపాటు తాగునీటి వసతి, మరమ్మతులను కలెక్టర్‌ పరిశీలించారు. నెలాఖరుకు పూర్తి చేయాలని సిబ్బందిని ఆదేశించారు. తహసీల్దారు సోమశేఖర్‌, ప్రధానాచార్యుడు ధనుంజయరావు తదితరులు పాల్గొన్నారు.