ఉపాధ్యాయ ఖాళీలు బ్లాక్‌!

ఏలూరు విద్యా విభాగం, న్యూస్‌టుడే: ఉమ్మడి పశ్చిమగోదావరి జిల్లాలో ఉపాధ్యాయుల బదిలీల ప్రక్రియ జరుగుతుండగా పలు ఖాళీలను బ్లాక్‌ చేశారు. విద్యా శాఖ జారీ చేసిన షెడ్యూలు ప్రకారం పాఠశాలల వారీగా ఉపాధ్యాయ ఖాళీల జాబితాను ఒక రోజు ఆలస్యంగా సోమవారం విడుదల చేశారు. దీని ప్రకారం గురువులు వెబ్‌ ఐచ్ఛికాలను ఎంపిక చేసుకోవాల్సి ఉంటుంది. ఈ నేపథ్యంలో తప్పనిసరిగా బదిలీ కావాల్సిన వారు ఆందోళన చెందుతున్నారు. ఉమ్మడి జిల్లాలో బదిలీ కోసం 5,840 మంది దరఖాస్తు చేసుకున్నారు. ఇందులో తప్పనిసరిగా బదిలీ కావాల్సిన వారు 1,466 మంది ఉన్నారు. ఆయా పాఠశాలలకు సంబంధించి ఎస్‌ఏ తెలుగు 56, హిందీ 132 కొలువులను బ్లాక్‌ చేశారు. మిగిలిన కేటగిరీల్లో రెండు, మూడేసి చొప్పున బ్లాక్‌ చేశారు. తెలుగు, హిందీ సబ్జెక్టు బోధకుల ఖాళీలు ఎక్కువగానే ఉన్నా రిక్వెస్టు బదిలీ కోసం దరఖాస్తు చేసుకున్న వారి సంఖ్య తక్కువగా ఉండటంతో సదరు కొలువులను బ్లాక్‌ చేసినట్లు విద్యా శాఖ వర్గాలు చెబుతున్నాయి. తప్పనిసరిగా బదిలీ కావాల్సిన వారిలో 3 నుంచి 10వ తరగతి వరకు ఉన్నత పాఠశాలలు, ఆ తర్వాత క్రమంలో 6 నుంచి 10 వరకు ఉన్నత పాఠశాలలు, 3 నుంచి 8 వరకు ప్రీహైస్కూళ్లకు ప్రాధాన్యం ఇవ్వనున్నారు. ఈ క్రమంలో తాము నష్టపోవాల్సి వస్తుందంటూ తప్పనిసరి బదిలీ కావాల్సిన ఉపాధ్యాయులు ఆవేదన చెందుతున్నారు. 1,466 ఖాళీలకంటే 30 శాతం అదనంగా ఖాళీలు చూపాలని కోరుతున్నారు.