ప్రతిభకు ఉపకారం.. చదువుకు సహకారం!

‘విద్యాదాన్‌’ తో విద్యార్థికి ఉజ్వల భవిత

ఆగిరిపల్లి, న్యూస్‌టుడే: చదువులో అత్యుత్తమ ప్రతిభ కనబరుస్తూ.. ఆర్థికంగా వెనుకబడిన విద్యార్థుల కోసం 2016 నుంచి కేంద్ర ప్రభుత్వం సరోజని దామోదర్‌ ఫౌండేషన్‌ విద్యాదాన్‌ ఉపకార వేతనం అందిస్తోంది. కళాశాల విద్యలో సత్తా చాటే వారికి ఈ సాయం ఉపయోగపడనుంది. ఇంటర్మీడియటలో రెండేళ్లతో పాటు డిగ్రీలో విద్యార్థులు ఎంచుకున్న కోర్సు ఆధారంగా ఏడాదికి రూ.10 వేలు నుంచి రూ.60 వేల వరకు అందజేస్తారు.

ఎవరు అర్హులంటే..

* 2022-23 విద్యా సంవత్సరంలో పదో తరగతిలో 90 శాతం మార్కులతో ఉత్తీర్ణత సాధించాలి. దివ్యాంగులకైతే 75 శాతం మార్కులు చాలు. * కుటుంబ ఆదాయం ఏడాదికి రూ.2 లక్షలు మించకూడదు. * ప్రభుత్వ పాఠశాలల విద్యార్థులతో పాటు బాలికలకు ప్రాధాన్యం ఉంటుంది. * ఇంటర్మీడియట, డిప్లొమోలో చేరే వారు దరఖాస్తు చేసుకోవచ్చు. ఏడాదికి రూ.10 వేలు ఇస్తారు. ఆ తరువాత ఉన్నత విద్యకు రూ.10 వేల నుంచి రూ.60 వేల వరకు కోర్సును బట్టి అందిస్తారు.

అవసరమైన పత్రాలు

* పదో తరగతి మార్కుల జాబితా, పోస్‌పోర్టు సైజ్‌ ఫొటో, 2023లో తీసుకున్న ఆదాయ ధ్రువీకరణ పత్రం లేదా రేషన్‌ కార్డు. * ప్రత్యేక ప్రతిభావంతులు అయితే ప్రభుత్వం జారీ చేసిన ధ్రువీకరణ పత్రం. * ఏ కళాశాలలో, ఏ కోర్సులో చేరుతున్నారో దరఖాస్తులో పొందుపరచాలి. * విద్యార్థికి వ్యక్తిగత ఈ మెయిల్‌ ఉండాలి. ఎంపిక వివరాలు ద్వారా పంపుతారు.

15 చివరి తేదీ

ఉపకార వేతనానికి దరఖాస్తు చేసుకునేందుకు ఈ నెల 15వ తేదీ వరకు అవకాశం ఉంది. జులై 2న ఆన్‌లైన్‌ విధానంలో పరీక్ష నిర్వహిస్తారు www.vidyadhan.org వెబ్‌సైట ద్వారా దరఖాస్తు చేసుకోవాలి.