బిడ్డపోయి బాధలో ఉంటే డబ్బులడుగుతున్నారు

రాజమహేంద్రవరం వైద్యం, న్యూస్‌టుడే: శిశువు మృతిచెంది తాము బాధలో ఉంటే... అంతిమ సంస్కారానికి ఆసుపత్రి సిబ్బంది నగదు డిమాండ్‌ చేస్తున్నారని రోగి బంధువులు వాపోయారు. ఆస్పత్రి అభివృద్ధి సొసైటీ సమావేశానికి వచ్చిన జిల్లా కలెక్టర్‌ సి.హరికిరణ్‌కు ఈ ఘటనపై ఫిర్యాదు చేశారు. పశ్చిమ గోదావరి జిల్లా చాగల్లుకు చెందిన సానబోయిన మాధవలక్ష్మికి నెలలు నిండడంతో రాజమహేంద్రవరం జిల్లా ఆసుపత్రికి వచ్చారు. వైద్యులు పరీక్షించి మృతశిశువు అని తేలడంతో శస్త్రచికిత్స చేసి బయటకు తీశారు. శిశువును తీసుకెళ్లి అంతిమ సంస్కారాలు చేసేందుకు ఆసుపత్రి సిబ్బంది రూ.3 వేలు డిమాండ్‌ చేశారని మాధవలక్ష్మి బంధువు గురువారం కలెక్టర్‌కు ఫిర్యాదు చేశారు. తాము డబ్బులు చెల్లించలేని పరిస్థితిలో ఉన్నామన్నా వినిపించుకోకుండా శిశువును అలాగే వదిలేశారన్నారు. ఎవరినైనా అడిగి తరువాత డబ్బులు ఇస్తామన్నా సిబ్బంది తమపై దయ చూపలేదని ఆవేదన వ్యక్తం చేశారు. దీనిపై విచారణ చేసి చర్యలు తీసుకుంటామని కలెక్టర్‌ చెప్పారు.