వన్యప్రాణుల దాహార్తి తీరేలా ఏర్పాట్లు

కుక్కునూరు, న్యూస్‌టుడే: ఎండలు మండుతున్నాయి. నీటి వనరులు ఇంకిపోయి, భూగర్భ జలాలు అడుగంటుతున్నాయి. ఈ పరిస్థితుల్లో అడవుల్లో మూగజీవాల దాహార్తి తీర్చేందుకు అటవీ శాఖ ఏర్పాట్లు చేసింది. జిల్లాలోని అడవుల్లో అపార వన్యప్రాణి సంపద ఉంది. ఇందులోని పాపికొండల అభయారణ్యంలో పులులు, చిరుతలతో పాటు దుప్పులు, జింకలు, కణుజులు, కుందేళ్లు వంటివి ఉన్నాయి. వాటి దాహార్తి తీర్చేందుకు చిన్నచిన్న సాసర్లు, కుంటలు, చెక్‌డ్యామ్‌లు ఏర్పాటు చేసి, సౌరశక్తి ద్వారా వాటిని నీటితో నింపుతున్నారు. వేసవిలో అడవుల్లో నీటి వసతి లేనప్పుడు జంతువులు జనావాసాలకు దగ్గరగా వచ్చేవి. బోర్లు, బావులు, చెరువుల వద్ద దాహార్తి తీర్చుకునేవి. ఆ సమయంలో వేటగాళ్ల బారినపడేవి. నీటి వనరుల ఏర్పాటుతో వన్యప్రాణులను కాపాడినట్లవుతుందని అధికారులు చెబుతున్నారు.