జగనన్న గోరుముద్ద తిని 15 మంది విద్యార్థులకు అస్వస్థత

ఆసుపత్రిలో కోలుకున్న అనంతరం విద్యార్థులను తీసుకెళ్తున్న ఎంఈవో రవీంద్రనాయక్‌, ఉపాధ్యాయులు

చక్రాయపేట, న్యూస్‌టుడే : చక్రాయపేట మండలం బురుజుపల్లె ప్రాథమిక పాఠశాలలో జగనన్న గోరుముద్ద తిన్న 15 మంది విద్యార్థులు అస్వస్థతకు గురయ్యారు. పాఠశాలలో 45 మంది విద్యార్థులుండగా శనివారం మధ్యాహ్నం మెనూ ప్రకారం కరివేపాకు రైస్‌ చేయగా 44 మంది విద్యార్థులు తిన్నారు. వీరిలో 15 విద్యార్థులు అస్వస్థతకు గురయ్యారు. కొందరు కడుపునొప్పి, మరికొందరు వాంతులు, విరేచనాలతో బాధపడుతుండడంతో ప్రధానోపాధ్యాయుడు రామకృష్ణారెడ్డి వెంటనే స్పందించి సురభి ప్రభుత్వాసుపత్రికి తరలించారు. అక్కడ వైద్యులు పరీక్షించి చికిత్స అందించారు. ఆహార పదార్థాలు నాణ్యంగా లేక పోవడంతోనే విద్యార్థులు అస్వస్థతకు గురయ్యారని వైద్యులు పేర్కొన్నారు. ఈ విషయమై ఎంఈవో రవీంద్రనాయక్‌ మాట్లాడుతూ పిల్లులు అనారోగ్యానికి గురైంది వాస్తవమేనని, ప్రస్తుతం పిల్లల ఆరోగ్యం కుదుటపడడంతో తల్లిదండ్రులకు అప్పజెప్పామన్నారు. విషయం తెలిసి జడ్పీటీసీ సభ్యుడు శివప్రసాద్‌రెడ్డి, అధికారులు విద్యార్థులను పరామర్శించారు.